حملتي ني يا عــــيوني راس الكاف *** ورميتي في غــامق الجــالة شـقفي
يا عيني من شوفتك بيا عفي
جِيتْ انوصَّفْ غَـــابت عليَّا لَوْصَافْ *** قُلْتْ انْعَـرَّفْهَا تْلَفْ فــِيهَا عَــــرفي
عدت نخــالف بين لعْراف و لَوقَـاف *** والبيت اللي نجيب يظهر بالخــلفي
يحسن عوني يا حروفي عدت نخاف *** عينيها نثروا التبـــر على سَــــقْفي
قَالتْ لِي يا واصف البـاهر بوصاف *** الوصف بلا وْصَــافْها غـيرْ تكـلفي
مايجــدي في جـالة العاتي مجذاف *** مقـواه اللي قـال يا موتي خفي
سيلي جـارف ما يشدوش الحشلافْ *** واللي يدخل ساحْـتي يتبع صفِّي
إذا قلت ادَّاتْ من طُــولْ الصَفْصَاف *** هي شَعْــواية زْهَى بيـــهَا خَــرْفِي
وإذا قلت ربيع جــــادت بيه ريـــاف *** هي صابة وْ قمحها جَــــاي يْصَفّي
هي شهدة معبقة بالعـشب صناف *** هي بلسم ويـن ما ينـزل يشفي
فطومة يا طــــــلة الفصل المضياف *** يا من فضلك حَـــفني ظاهر وخفِي
فطومة يا سلـيلة السَـــادة لشراف *** يا لبــة وصغارها لعْبُوا طـــــرفي
عارم حــــرية بيحت عـالي رفراف *** والبـاز حــــذاها يْفـتَّشْ في حــرفي
خفت نقول يقول هذ الشــــاعر حاف *** وإلا تمَّـلكوا الغــــيرة من وصــفي
دونك يا طــير المحبة ظفر الســاف *** خــزرة من عينين ذا الجارح تكفي
وَشكُونْ اللي قَالْ ثوب العــزْ قْصَاف *** ما زال العــــفَّـة تغـــــــطي وتدفي
حملتي ني يا عــــيوني راس الكاف *** ورميتي في غـــامق الجـالة شـقفي
عمر زيعر