وعلاش يا قمر
  ـــ عبد السلام بن مدورـــ

وعلاش يا قمر تتخبا
وتركتني وحيد معدب
الحبيب منزله في الغربة
و انت غريب عني غايب
ما جا و ما وهبلي وهبة
حتى ضحى قليبي دايب
انت مع اللي بغرامه مضاني
درتوا القلب وسط احيوط و بيبان
ادا فهمت قصدي و دريت معاني
اجي نحدثك بحديث الميزان
موصوف بالمحاسن نورك اسباني
كيف الحبيب زينه يسحر الادهان
و ادا حبيب قلبي بالمر اسقاني
انت بلا مرار اغيابك قطران
وعلاش بالظلام اتكافي عيناني
رجعتني وثيق انقاسي الاسجان
صفاتكم شركة يا البدر الساني
انت مع الحبيب ارجعتوا صدقان
وعلاش يا قمر تتركني وحداني
وعلاش هكدا في الرحلة عجلان
وعلاش يا قمر ما ترحم
هدا شحال و انا نرجاك
الحبيب راه فيا سلم
وانت معاه غايب في سماك
ننساك ما نعود نخمم
و ادا نسيت ننساه معاك
اواه يا قمر ما ترجع لمكاني
ناوي نسير وحدي نلقى لمان
وعلاش فيك نرجى واللي عاداني
وعلاش بيك نفرح و انت غضبان
وعلاش بيه نزهى و هو ينساني
وانت بلا سباب اتفارق لمكان
الحب و الهوى و غرامه مضاني
و اليوم فاض كاسه و رجع مليان
هدا خلاصها يا فاهم لمعاني
محال ما نزيد انعاشر فتان
قصة موثقة في حلة ميزاني
فيها ملام درته للزوج اقران
وعلاش يا قمر تتركني وحداني
وعلاش هكدا في الرحلة عجلان
الحديث تم ما نرجع له
و اللي بغا يلوم تركته
و ادا يسال ما نهدر له
و السر في الاعماق اكتمته
ربي كريم جاد بفضله
و اللي كويت بيه اكتبته
باسم الكريم نختم و على المدني
بصلاة دايمة ما صاح الورشان
بالورد و الزهر الفل و سيساني
الطيب و العطور الياس و ريحان
و عداد كل قطرة من الامزاني
و ما هطل ماء و جرى في الويدان
عبد السلام قال نبين عنواني
بهجة مبهجة بيضة يا الاخوان
يا واسع الفضل و الجود و الاحساني
عبدك ديرله بيته في لجنان
يا خالق الخلايق زهي وجداني
بزيارة النبي الحبيب العدنان