قصيدة: :الضيف"
نظم: الشيخ الجيلالي امتيرد
امرمت لمبيت لمثني

الحربة:
أَ ضِيفْ الله رَدّْ اجْوَابْ اسْئَالِي + لَا تَحْشَمْ رَدّْ السّْلامْ
القسم الأول:
سالوني يا أهل الهوى كيف اجرى لي + يامس فالداج يا اكرام
بلَّجْتْ أوصايدي وسَدِّتْ اقفالي + واضحيت انصارع المنام
بين افياق وانعاس والضو اطفى لي + نسمع من دق فالرسام
لحت اغطايا ونضت مبهوض انلالي + حطيت يدي على الحسام
قلت أمن جا إيسال فالثلث التالي + والليل اليال والظلام
سميت وزدت باسم الحي العالي + سلمنا قلت يا اسلام
افتحت الباب ما افقهت أش اقبالي + ضيف الله قال لي اقوام
سوَّلتُه من اتكون زاد فْتَنْخالي + وادخل مطرود كَ اسهام
القسم الثاني:
فالحين اشعلت اشمعتي + واسبلت افراش قبتي + لمْطَايب طيبْ لحديثْ
قلتْ بشوقي وليعتي + اجلس يا روح راحتي + نزْهاوا بكل ما انويتْ
سبعين اسْنَا فْليلتي + قرب نسطاب فرجتي + ردّْ اجوابي إلى ادويتْ
درت الشمعة اقبالتُه دون اشمالي + وانحقق فيه بالنيام
انحقق ذاك الحبيب واتبدل حالي + زاد الشملة على اللثام
واعقد عبسة اتدوب منها الجبالي + وارجع لي من أولاد حام
كوري مغلوق أو شلح فْ تَمثالي + ولاَّ عجمي من العجام
هــذا زَنْـــزُونْ قلت ولا بوهالي + ولا سكــــران بالمـــدام
قلت أعجبي الضيف يغضب فامْحَالِي + بلا سبة بلا اخصام
لعن الشيطان قلت يا نور اهلالي + يا تارك مهجتي اسقام
يا سبتْ ليعتي وُهَوْلِي واهوالي + وما فالغيب من احكام
القسم الثالث:
أ سيدي قلت لُه اكفى + ترك التيهان والجفا + الجواد بجودها اتجود
ديك الشوفة العاصفة + قسمت قلبي امناصفَة + حر من امضاوتْ السيوف
لوَّحْ تنكيرْتْ الجّْفَا + واشفى يا ضيفْ ونشفى + واعطف بمكارم العطوف
أنت في مرسمي وزايد تنخالي + آشْ جابك لي بلا اغرام
أُ لضيافْ كلها بالجواب اتشالي + وأنت لا صوت لا اكلامْ
انْصَرْمَتْ اعزايمي وُفَضِّيتْ احيالي + وُعَقْلي فالُوهَامْ هَامْ
وادوا من بعد ما استفسر فاقوالي + لبْصوتْ اسمعتُه بْلا انغامْ
كصوتْ اخْنِيسْ في ادواخل لدخالي + من ضيق الثوب واللتام
طالب مفروق قال عن جمع امثالي + برَّاني ساكن الخيام
وانفتش فالعلوم مَدُّوب اهلالي + حافظ لسوار بالتمام
هاني في ذا البلاد مقطوع الوالي + لا بو لا خو لا اعمام
القسم الرابع:
طالب مفروق بلدنا + اطلبتك ضيف ربنا + نلقاو الصرف بالحسان
ارمانا ليك وعدنا + ارفع بينا وعَزّْنَا + لا حكم الخارج لوطان
الطلبة معدن الغنى + انكتبوا لك سر حرزنا + تجليب الرزق للمكان
الطالب قلت ليه ما كايخفى لي + محتوم إيذكر المقام
وأنت كصيد فوق لفضا ضيالي + لمسافر ما ارجى امقام
نغزل غزل الهوى على حسن امقالي + وُعقلي فالهوى امرام
قلت أش اللي يفيد في صح اعمالي + نبرمت بخفتْ العظام
وجَّدْتْ فَّاكْهي وطبخي واشغالي + وارفدت الطاس كاغلام
مد إيديك قلت ليه يا الشاطن بالي + واستأْدَبْ زِدْ للطعام
مانا فاطعام قال لي شُفْ اخيالي + فالعشبة ما أوفيت عام
مَنْ مَايْ العينْ قلت لُه طيب احلى لي + والضامن فيه بو اعلام
القسم الخامس:
يغضب لمليح ويرضى + وأنتَ يا راحتْ العضا + مالك من جانبي امريض
هزيتُه هزَّتْ الكضا + من حر الشوق واللضا + حزْتُه ليَّا بكل هيض
حتى سخنا على الفضا + صيَّحْ مقياسْ الحْضا + وانكشَفْ الحجاب الغليض
نجبر تاج البدور عراض الفالي + ولفي سلطانت الريام
واظهر ذاك الجبين كبدر إيلالي + والخدادة مع لوشام
أنت هو الضيف ما شفَّكْ حالي + لكذوب فديننا احرام
قالت لي سالني انفيدك باسآلي + من بعد سَتْوِيتْ للمنام
حير عقلي اهواك يا عز ارجالي + واخرجت انهيل بالقدام
واخفيت على اعيون العدا عذالي + لحضرتك شادَّة احزام
هات الصفرة وزيد غدَّرْ قمصالي + قلت لها ما ابقى امنام
ليلة في ليلها المنعوم اليالي + لا ريح إيهبّْ لا اغيامْ
القسم السادس:
خذ أ حفاظ وارتوى + ضيف من ضياف الهوى + زهوة وزهو لمن زهاو
مسطور ولا يلو انوى + ببديع محاسنُه ضوى + برضاهْ أهل الرضى رضاو
واللي بجهالتُه ادْوَى + معلول ولا إيلُه ادوى + مطموس انواجلُه عْماوْ
قال افصيح اللغا الحبر الجيلالي + عُوَّاصْ اجواهر النظام
زوَّاقْ ارقايقي وطرَّازْ اشغالي + واشجيع الحرب فاللطام
قولوا للناكر العديم السفالي + يتأدَّبْ عَرّْتْ الغشام
شيخ ابلا شيخ لَوْ اعمر جبحُه خَالِي + ما إيلُه مبدا وُلا اتمام
هذا بحر اغميق واطميمُه مالي + يرهب بافراتنُه اقوام
غنَّى نَحْلِي واطعمْ بالشهد امصالي + والسعد على الرضى اسقام
واعمر سوقي وباعْ واشْرى دلالي + سوق ألا فَرْغْ منْ ازْحَامْ
طهجْ ارياضي القَحْ واضميري سالي + واعبق بقلايْدْ النسام
واسلامي للشياخ بمْسَكْ واغوالي + ما فاح الورد بالنسام
وعلى الودبَة العايقين ابتفصالي + ما دام الحال بالدوام