أ شيخ انزل فالناس طامعين اترجل و انصاع
و العزة للي شاع........بالحكايم و العلم انفع
و الراي الي خدام ما يجي يتزعم بذراع
و الحكمة ليها طاع....من تحدى لسيف ارفع
اللي ناصح للناس ما تكيدو فيها لوجاع
صدرو ليها يوساع......في مقام رفيع اتربع
يا رافع ذاك الراس طحت وحدك ما بين اسباع
منفي مالك تباع........ذل شانك ما عاد ارفع
و لي يرجى شيعات حط حرفو فالسوق نباع
و اسمو بيها ينذاع......فالمحافل تاج مرصع
دارو بيه اللمة عارفينو ما فيه نفاع
راهو ليهم سلاع.........و البهيم احصد واش ازرع
عاتب خيك بحسان لا تجاهر و العيب وساع
راه اتعرى فالقاع ......من ضحى من دونو يصفع
ما يتساوى عراف فالنصيحة بلي شوناع
خاوي حسو قرباع.....للفضيحة باقي يجمع
فايز ما بين شياخ شيخ خلا بعدو صناع
معدن صافي لماع......في وقات الشدة يهجع
أ شيخي كون لبيب و الفطين لغيرو سماع
ما تعرف وين انفاع.....ذا بحر علوم اتفرع
خلينا نتهداو فالمحبة من غير نزاع
ما تتشابه لصباع......غير هني بالك و اسمع
هاذ الغلطة خلات حال هاذ الامة فالقاع
جاهل فيها بداع.......و القطيع اتفرق يتبع