-- خوالف لحزان --
جيت قاصد بابك يا رفيق الرحمان
كلها ؤ صاحبو ؤ انا وحداني
فتيوني ياسادة حملة القرآن
كيف نحيا ؤ كل الناس عدياني
*******************
المقصود فالوفي الا انا جحت يبان
حالتي لا حالة من الجحود سقاني
توسمت سنادو ارماني فالخليان
انا فتنحال ولقلب تحيطم بتحناني
*******************
ظنيتهم خوالف تفكو بريح لحزان
تهدمت خيمتي ؤ صحابي طعاني
العطية من عند الله المنان
الا خذا هو فالاصل اللي عطاني
********************
رفق يا الصاحب صارت يامي ديجان
مرارة العيشة و لوحش بكاني
نرادف و نسقي الضيم مع الندمان
من جورك بكات بين يدي كيساني
********************
الناس فالطبايع أحجار ؤ جمان
ؤ أنا غلطت ما خترت اللي من طياني
اتبعت الرفيل فزواق كلامو فنان
ؤ ماسمعت لكلام رايس المعاني
********************
من بعد الشدة غادي لعمر يزيان
واللي طبعو طميم زمان خلاني
ظامي مايحلا ماه و يموت عطشان
يكافح بين الصخور ترميه ك رماني
********************
كيف طعم العيشة الا الصاحب خان
حتى من لحلاوة مرارت فلساني
ما بقات ثقة ف آدمي و لا حتى جان
متموم فحياتي نديرني ف ميساني
********************
لله يا قاري لكفوف عطيني برهان
مال خطوطي تفرقات نايحة ف حضاني
نصيبي برماح الصاحب نعيش نكدان
ممحون ماجاب اخبار الصاحب نساني
********************
نسألك لله ياعمري وين الصدقان
شعلتك شمعة ؤ تحرقت بنيراني
يوم خطويت في لجمار تسرسبو دخان
ما حسيت بالنار و غدرهم كواني
********************
فينكم أ حبابي فوسط الدفا بردان
عايش وسطكم عدت براني
حسبت راسي مغطي و بغطاكم عريان
الزمان يعلم، يعريكم ما عراني
********************
اتقنت دور الصاحب و انت حقدان
قناع الخاوة ما هو طبع إنساني
صغ لي أصاحبي كن صادقت حيوان
نتوسم خير ولا خرب ديواني
********************
حسبتك طير حر زهرت ليك لغصان
ؤ فأول خريف كسرتي جذعاني
سمحتي فيا لما عاد ربيعي ذبلان
و عتايا فجذري و أصيل رباني
*********************
سمع مني يا الصاحب انت خسران
تعنيتي بحاجة لغير ما تعيش هاني
غفلتي الصحبة و درتي طمعك عنان
ولو تلبس تيجان عمرك فاني
*********************
ما نغفل كتاب الله و نتبع لفطان
ما نخالف قدار و لمكتوب فوقاني
انت باقي غافل و طريقك حيفان
نهار يتسدو البيبان تعيش تعاني
**********************
من باب الوفا و الصدق سقيتو وديان
موجة لغدر غرقني و بدموع سقاني
الزمان غدار و الصاحب مافيه امان
سمعتها م لبرار و نظراتها عياني
**********************
ولا مرة حسبت كنت مربي سيطان
سمهم البارد سرى في شرياني
عدت مهموم ساهد ليالي حيران
انطفى سراجهم و توضر سلواني
***********************
على سهوة جار الصاحب بعد الشان
لا شطارة فالجور و الزمان حقاني
حل صيفك يا قلبي و حصادك حان
زرعتي خير و نبت وردك شراني
***********************
هذا جزا شمايلي بعد أهوال النيران
لامة الهتوف شكراتني بهجراني
هلت دمعاتي و دعيت للديان
اللهم نصرني وعافي لي بداني
***********************
بعد شدايا صرت نوح كما الورشان
لا صاحب كان وليفي سمع شكياني
كلها و بابو وصيد من بعد الطوفان
راسي يا راسي حبابك عدياني
***********************
من الولفة تجني حبق ؤ سوسان
وانا جنيت حدجات من بستان خلاني
نحكي هموم الصحبة بدموع الضميان
ولا نسقي بالعبرات شوك جناني
***********************
لوحدة صابتني م لوجوه عدت هربان
خرج عقلي ؤ نار الذات مالكاني
ماجاب خبري لحاجته يطوي بلدان
لبلاد صغيرة و خباره واصلاني
***********************
كما هجرتي حبابك و كبرتي جنحان
تسقط بعد علاك و لعمر كله معاني
ما يآمن بدموعك سليل الرجحان
غير لئيم كحالك للطمع شهواني
***********************
يا لجاحد ماحسبتك حرباية ملوان
بسمتك فنان و دموعك خادعاني
فالرخا مكار ؤ ما عرفتك مزيان
ؤ فشمتة الشدة نعرف خواني
***********************
لبستي زواق و خفيتي سواد الغربان
بغيتني جيفة بعد النسور الجارحاني
نحلف صادق انا طير حر م لبيزان
ؤ غدرك ما قتلني زاد أحياني
***********************
لله يا الرجاح صاحبي حكم بمحان
جفاه صابني ؤ بعذاب لهجر بلاني
جازيتو بمحبة ما صدرت بنقصان
كن صادقني وقبل ولفو هناني
***********************
أرفق يا الصاحب ؤ جود باحسان
تدور الدواير و تعود تترجاني
ما فقهت ف لمكر ؤ خصايل الثعبان
و ربيت عقارب و ثعالب فحضاني
***********************
ما ينفعك من غير ظفرك فالحكان
عند الحاجة جنبي ما يعرف نكراني
ذوق ياصاحبي كما ذقت حر النسيان
و انت العارف فعالي قد لساني
***********************
لوقت تتبدل ودابا تضربك لركان
و تتمنى السلوة كما فزماني
ياما في بحور لهموم شربت اوزان
موجاتو لعاتية غرقات رفقاني
********************
أصاحبي تفكر مولاك العمر فان
غدا لختام يعلم انا و لا انت كفاني
يوم التسراد ما ينفعك فعل لبهتان
غير صوالحك وما تخون عهدك تلقاني
***********************
اصاح عذ بالله من يبليس الشيطان
مازال تترجى الرفقة تعود ثاني
يكفانا نكاد لهجر ؤ نار الصدان
لجبال ما تتلاقى وانا تلقاني
***********************
قهر الصحبة مادواها غير النسيان
و المقهور كي حالي شكون داواني
قدام غرايب العمر نجلس حيران
ما نلوم الصاحب هذا قدر رباني
***********************
ادع يا الناشد لصاحبي بالغفران
يكفيه حسرة فالشدايد ما يلقاني
فرط فالمحبة خاب ظنو خسران
أنا الرابح تعلمت ك نسد بيباني
***********************
يا الصاحب بحر الطمع مالو شطآن
سال عني احروف الوفا تلقاني
العين عاسي ماجابو عسل جبحان
و الياء يبريز و الزاي زافر حقاني
***********************
عبدالعزيز الحرفاوي - مراكش - المغرب